Arna Stjarna

Djöfull er að heyra þetta !!!!

Allir 9 fráfarandi ráðherrararnir og aðstoðarmenn þeirra verða á launum út febrúar og þá taka við 6 mánaða biðlaun sem eru jafnhá launum þeirra;.. Hvernig getur þetta fólk sem hrakið er frá þinginu, af mómælendum, haft siðferðisþrek til að taka við öllum þessum launum?? Mér þykir afar trúlegt að þetta fólk þiggi svo þingmannalaun líka nú þegar það starfar á þingi í stjórnarandstöðu. Svo fá þau laun fyrir nefndarstörf og hlunnindi ýmiskonar....ókei að fá laun fyrir vinnuna sína það er afar eðlilegt en að fá svona og allskonar biðlaun fyrir vinnu sem ekki er verið að vinna er ekki eðlilegt....höfum við skattgreiðendur ekki nóg samt??

Haaallllóóó, hvað er að ykkur?? Hvernig getið þið horft á spegilmynd ykkar hvern dag um leið og þið skrúbbið á ykkur skítugan skoltinn?? Atvinnuleysingjar, á tíunda þúsund í dag, áttu að fá ,,biðlaunin” sín í gær, sem eru svona fimmtungur af ykkar biðlaunum, og kerfið hrundi, það hreinlega réði ekki við að borga svona mörgum í einu þótt upphæðirnar væru grátbroslegar. Mikið væri dásamlegt að kerfið sem sér um að greiða inn á reikninga ykkar, laun sem þið svo sannarlega ,í þessu tilfelli vinnið alls ekki fyrir myndi klikka. Ja það er öruggt að því yrði kippt strax í liðinn Og hvað með Davíð hvernig getur hann í óþökk langflestra íslendinga setið á sínum fúla rassi í seðlabankanum?? Svona í alvöru, hvað er að? Ég þekki engan sem myndi getað setið þarna undir þessum kringumstæðum. Ég óttast að sitthvað sóðalegt eigi eftir að koma undan stólnum hans Davíðs þegar Jóhanna dregur hann nauðugann út....ef það tekst ekki má bara hleypa straumi á helvítis stólinn. Stundum þarf að klára erfið mál með hörku. Og seðlabankabreytingarnar kosta okkur þræla þessa auma skers á milli tvö og þrjúhundruð milljónir....eftirlaun og biðlaun...og allskonar laun

Hvað gerist með þetta blessaða fólk þegar það kemst inn í þinghúsið?? Gylfi var þess fullviss að afskrifa mætti einhverjar skuldir heimila og fyrirtækja aðspurður um úrræði fyrir stjórnarslit...allir álitu hann þingkost góðan en svo um leið og stóllinn hitnar undir rassgatinu á honum þá sér hann að það er allskostar ómögulegt að hjálpa með þessu móti heimilumog fyrirtækjum ,,,það myndi steypa fjármálum landsins á hausinn. Það er eins og það sé heilaþvottastöð þarna í þinghúsinu okkar...meira að segja Steingrímur heldur kjafti varðandi hvalveiðarnar ..Skammist ykkar óhæfi stjórnarskríll og reynið í það minnsta að sjá sóma ykkar í því að þiggja ekki þau laun sem þið ekki vinnið fyrir.. peninganna er víða þörf í samfélaginu. Skammist ykkar aumi stjórnarlýður sem hefur hert svo að okkur aumum þegnum þessa lands með ófyrirgefanlegri vanhugsun sem stýrt hefur landinu okkar eftirlitslaust í helkalt og grásvart hafið. Ástarkveðja frá Stjörnunni sem getur ekki hugsað sér að verða fótsnyrtir eða þingmaður

	Pólitískar hreinsanir og heift
Ábyrgðarmaður færslu Tilkynna um óviðeigandi tengingu við frétt

'OMÆGAD

Ji minn :)

Það er nú bara ekkert öðruvísi en það að loka varð útibúi NÝJA LANDSBANKANS í Reykholti tímabundið í dag vegna yfirkeyrslu og útsláttar tölvukerfis. Svo svakalegar voru millifærslurnar að kerfið réði bara ekki neitt við neitt:/

Sem sagt margir búnir að skrá sig hérlendis meira að segja ætlar fólk að ferðast langar leiðir, frá útlandinu, til að hitta okkur:)

Hlakkus í nefndinni:)

Og slagsmálunum linnti !!!!

Jæja elskuleg um landið þvert og endilangt og þið ukkar sem yfirgefið hafið vort yndislega, um skamma hríð eða til langframa. Það er nú af okkur í nefndinni helst að frétta að haldinn var langur og strangur fundur í viku liðinni. Það sló í brýnu milli nefndarmanna og engu mátti muna að blóðug átök brytust út og var deiluefnið það að hvort reyna ætti að ná samningum við Ragga Bjarna eða Sumargleðina, á staðinn til að skemmta okkur á hátíðinni tilvonandi. Það er nú engum blöðum um það að fletta að engin samstaða náðist og umræðurnar urðu heitar, fúkyrði fengu að fjúka og Guð minn góður á himnum og allir hans englar. Ég get sagt ukkur það að ég hélt að þarna yrðu stjórnarslit bara…En viti menn Sigríður Morthens bara sló þéttingsfast í borðið og allt datt í dúnalogn. Ja hún Sigríður ætti bara að verða kennari það get ég sagt ukkur, ég er nú hrædd um að Sigríður sú er kenndi okkur um árið hefði fegin þegið ósköplítið af agahæfileikum nöfnu sinnar. Nú bið ég ukkur kæru samnemendur að koma með ukkar álit á fyrrnefndum skemmtikröftum og ef þið munið eftir einhverjum öðrum stórstjörnum vorra tíma, að geta þeirraJ Örfá orð hafa bæst í orðaleikinn góða. Flapalegur = hirðulaus um klæðaburð og framkomu.Hímaldi =slæpingi, letingi.Fermur = duglegur. Leggjum þetta nú vel á minnið því hver gleypir ekki við álitlegum vinning á krepputímumJ Knús frá nefndinni. Ja…………. hún SigríðurJ

Blásum til veislu!!!!

Jæja kæru 25 ára gagnfræðingar nær og fjær

Sem ég sit hér við gamla singler spectrum tækið mitt sem er díselknúið og splittað að aftan er ég bara allt í einu búin að senda ykkur öllum boð á fyrirhugaða hátíð sem áætlað er að halda í upphafi ókomins árs. Það er ekki loku fyrir það skotið að maður komist nú bara við, verði hrærður, svo þakklátur er maður almættinu fyrir þekkingu og hugbúnað nútímafólks. Það flæktist nú ekki fyrir manni tæknin hér í denn í GSS þegar maður var að uppgötva lítil tæki sem kölluðust tölvuleikir, svo litlir að þeir fóru vel í milletúlpuvasa, MAN EINHVER HVAÐ ÞAU TÆKI HÉTU? og Daddi í daddabúð reiknaði út hvað sinalco og lakkrísrör kostaði, á blaði með blýanti. En auðvitað nutum við góðs af JR og Mexikananum það var ekki peningaskorturinn í þá daga enda vissum við ekki hvað verðbréf væru og eina sem ég þekkti ,var Super-pacman, snikkers og appelsín. Þetta var nú meiri sælan og áhyggjulaust var það. Þó man ég nú eftir verkfalli í skólanum eitt sinn en það var þó ekki það versta því verra var þegar sígaretturnar kláruðust í landinu og við þurftum að troða í pípu því píputóbak var það eina sem var til í landinu það misserið……..Það þótti nokkuð svalt að sitja á JR með pípu í annari og malt í hinni.

En auðvitað er maður farinn að reskjast og minnið orðið ögn glopótt svo ljúft væri að þið deilduð minningum og bæruð upp spurningar sem við í sameiningu myndum púsla saman fram að hátíðinni mikluJ

Sem sagt fyrsta boð er farið í loftið og við í nefndinni vonum að það komist til skila. Okkur hefur ekki tekist að hafa uppá örfáum nemendum en ef einhver veit netföng hjá þeim eru þær upplýsingar vel þegnar.

Ásdís Íshólm, Hrund Péturs, Jóhann Haukur, Róbert Bjargarson og Helga Bára .

Þar sem við í nefndinni höfum ákaflega miklar mætur á gömlum orðum og setningum höfum við ákveðið að birta hér eftir nokkur sem við biðjum ykkur að leggja á minnið því hugsunin er svo sú að hafa leik á hátíðinni, jafnvel á milli bekkja, þar sem veitt verða vegleg verðlaun fyrir flest rétt svör. Í kreppu er ódýrast að hafa skemmtiatriði sem flest heimatilbúinJ

Hér koma fyrstu orðin og setningarnar.

Sóttar-buxur = saurug ull á kindarrassi.

Þúfnalúra = steinsmuga, niðurgangur.

Að taka upp undir = að verða ófrísk

Þvengja-lengja = langur mjór maður.

Raddar-stafur = Sérhljóði. (bragfræði)

Okkur er það bæði hollt og skylt, fyrir aldurs sakir að kunna og gera gömlum og góðum orðum greinagóð skil

Þangað til næst knús frá nefndinniJ

Við þurfum að hugsa um liðina ha............

Jæja elskurnar mínar nær og fjær. Nú er svo komið að Stjarnan hefur dvalið ásamt fleiri eldri borgurum á Kanaríeyjum síðastliðnar þrjár vikur. Miklil ósköp hvað þetta er nú gott fyrir liðina og mjaðmirnar segðu....En alltaf er nú best að koma heim í Heiðina þrátt fyrir efnahagsástandið. ÞAÐ ER BARA TIL EITT ÍSLAND KALT,SVALT OG SJARMERANDI. Nokkrir spánverjar tóku mig tali þarna suðurfrá og spurðu mig hvort ég væri finnsk...... ég hugsaði mig um, helvíti fær maður nú gusuna um það að þetta sé bara gott á okkur því við fórum í of mikla útrás?.... og svaraði svo, á minni frábæru spænsku, notekero de islandia el GSS ottjo sess porfarvore, sem átti að þýða: nei ég er íslensk árgangur 68 í GSS þakka ykkur fyrir....Þeir ágætir, hneigðu sig bara og gáfu mér rósir og sankríu. JÁ elskur svona erum við þekkt þarna suður á spáni. Svo töluðu þeir um Gumma Jóns, Jóns Gunnlaugs, Robba, Gumma löggu og Hrönn. Það sem þeir sögðu um hana hef ég nú ekki eftir hér svona á opinni síðu......við ræðum það vinkonurnar í stólnum síðar ha......Hrönn ja......hver hefði trúað því? jæja ég lofa að segja ykkur frá því í des kannski, reyndar hef ég ekki séð neina skráða GSS bloggvini á þessari síðu svo ég sé bara til.

Eníhá nú fer að lifna yfir þessu öllu við sendum út póst í næstu viku með innihaldsríkum upplýsingum sem þjappar hópnum enn betur saman. Frábært að sjá hvað fjölgar hjá okkur á facebook og endilega skráið ykkur sem bloggvini hér líka og deilum saman gömlum og góðum sögum. Eins væri frábært að fá tillögur að einhverju skemmtilegu sem ykkur dettur í hug.

knús frá nefndinni sem er að detta í þvílíkannnnnnnnnnn GÍR

Þakklæti...læti

Jæja elskulegu

Nú er það af nefndinni helst að frétta að við höfum hringt í alla kladdaladdana og fengið upp netföng. Það er skemmst frá því að segja að nefndin ræddi andáttug um viðbrögð ykkar við símtölunum....almáttugur hvað þessi árgangur er kurteis og vel úr garði gjörður ha. Ja hann Rafn blessaður enskukennari á örugglega þátt í þessu þó hann hafi þurft að klípa í eyru nokkurra nemenda og snúa uppá en.... mægad hvar haldið þið að við höfum lært áræðni og kurteisi haaa Hvort óttablandin virðingin hafi verið sjáanleg gagnvart öðrum tungumálakennurum skal ég ekki fullyrða......borð út í horni......við og Andrésblöð undir borðunum....blöðin voru þó á réttu tungumáli.......kannast einhver við þetta? Týndir kladdar ......Ölfusá.......kannast einhver við það?

ææjæææ hvað var nú stundum gaman í gaggó...

Nema hvað nefndin vill þakka ykkur sérstaklega fyrir að taka svona vel á móti símtölum okkar og fyrir að sýna verkefninu svo stórkostlegan áhuga. Það eflir okkur enn heldur í samningaviðræðum við húseigendur, sem sumir hverjir vita ekki hvort þeir munu eiga húsnæði sín, sem við erum að falast eftir í janúar :) Allt í gríni í kreppunni :)

Eníhá við sendum upplýsingar um leið og þær berast:)

Látið fagnaðarerindið endilega svífa um í köldu íslensku haustloftinu..

Ef hugmyndir þrengja sér inná harða diskinn, endilega skráið þær á síðuna okkar. Ekki það að við höfum margar og góðar en lengi má á sig blómum bæta:)

<<<<<<knússss frá nefndinni

Dagsetningin umhugsaða

Jæja kæru skólasystkin. ´

Nú var það þannig að á fimmtudaginn síðastliðinn hittist nefndin yfir kaffibolla á eina kaffihúsi Selfossb.....nei Árborgar verðum við að segja. Þarna komu þær fraukur að sunnan Sigríður og Margrethe, sú danska öðru meginn. Endalaust myndarlegar verð ég á segja. Ja ekki hafa þær nú elst að kalla skildi enda vel giftar báðar, bráðmyndarlegum mönnum hér úr flóanum. Nú þar sem við Camilla sitjum þar, ásamt þeim myndarlegu, yfir góðum sopanum, kemur Helgi inn á Krúsina nýrakaður og uppáklæddur, ja hver vildi ekki raða í fataskápinn hans HÚGÓ BOSS og svona fíneríi. Ja farið er mér að förlast ef elskuleg eiginkona hans er ekki ættuð hér úr Sandvíkurhreppi, brotin í buxunum og ermahnapparnir, þetta er kona af okkar kynslóð ha....

Nema hvað dagsetningin var ákveðin. Laugardagurinn 17. janúar 2009. Það var nú bara ekkert öðruvísi. Ákveðið var að hringja í nemendur og fá uppgefið email eða póstfang svo við getum dælt reglulega á alla þeim upplýsingum sem eru í boði. Látið ukkur því ekki bregða þegar við sláum á þráðinn og reynið að vera svolítið létt í lund því þetta er erfitt verkefni fyrir nefndina sem hefir ekki í ukkur heyrt á sjötta ár og er innundir sig, rjóð og feimin. 25 ára fögnuðurinn verður haldin á Selfossi það er öruggt, en við erum í samningaviðræðum við tvo staði og reynum eftir fremsta megni að fá ekki verk í veskið, því nægir eru þeir þar víða. Þegar við komun svo með staðsetningu og verð ætlum við að biðja ukkur að staðfesta komu ukkar svo að fjálögin haldi hjá okkur.

Endilega breiðið út fagnaðarerindið og látið okkar fólk vita af síðunni okkar mig t.d vantar email hjá Aldísi Maríu Sigmundsdóttur í DK og Guðrúnu Kristmanns í Finnlandi veit einhver eitthvað um það mál?

Kiss og knús og hlakka til að hitta ykkur í janúar

Stjarnan:)

ÓTRÚLEGT EN SATT

Jæja kæru og elskulegu.

Nú er það ekki öðruvísi en svo að við verðum 25 ára gagnfræðingar á vori komanda, hvur skildi trúa því?....Er ekki með ólíkindum hvað tíminn líður hratt og við, að okkar áliti, eldumst hægt?????

Nú er mál að gleðjast og fagna svo um munar, og var ég á síðustu samkomu okkar sett í það starf að kalla saman stórgóða nefnd sem á að skipuleggja fögnuð mikinn. Nefndina skipa auk mín Helgi Jóhannsson stórgóður og glæsilegur piltur, sonur Jóa löggu, og gott ef hann er ekki ættaður úr Flóanum, Sigríður Morthens, dóttir Gústa í veiðibúðinni, yndisleg frauka sem reyndar flutti suður til Reykjavíkur, Jóhannes Larsen, broskall sem býr í grend við Sigríði fyrir sunnan, Margrethe Andreasen undurfríð og flýgur um loftin blá og ef mig misminnir ekki er hún dönsk í aðra og síðust en ekki síst Camilla Guðmunda, sem er fjárbóndi í félagi við sinn mann, austrí sveit og hver man ekki eftir Óla Bjarna föður hennar?

Við höfum nú haldið okkar fyrsta fund sem gekk ákaflega friðsamlega fyrir sig, og voru hugmyndir okkar margar og góðar. Fljótlega mun birtast hér áætluð dagsetning af fyrirhugaðri skemmtun svo og fréttir af fólki, aðbúnaði þess og bankainnistæðum:)

Það er von okkar og trú að þið sem sjáið og kannist við okkur hér í '68 árganginum látið fagnaðarerindið berast og endilega skrifið eitthvað á þessa síðu sem er ekki síður sett upp fyrir ykkur en okkur:)